martes, 10 de diciembre de 2024

RECOMENDACIÓNS LECTORAS PARA O NADAL

O Nadal está á volta da esquina e quen máis e quen menos xa escribiu a súa cartiña cos agasaios que lle gustaría recibir. 

Os libros sempre son unha boa opción para pedir, por iso vos deixamos por aquí unhas recomendacións lectoras que nos parecen interesantes por se andades escasos e escasas de ideas.

BO NADAL A TODAS E TODOS!

jueves, 21 de noviembre de 2024

NOVEMBRO. MES DA CIENCIA EN GALEGO

Dende fai uns aniños, o mes de novembro adoita dedicarse á conmemoración da ciencia en lingua galega. Por aquí vos deixamos algúns exemplos de experimentos que estamos a realizar estas semanas para impulsar o emprego do galego dentro do ámbito científico.

sábado, 9 de noviembre de 2024

VOLUNTARIADO NA BIBLIO

 Este mes de novembro puxemos en marcha o VOLUNTARIADO NA BIBLIO. Durante os recreos, cada día, dous nenos ou nenas diferentes de 6º de Primaria estarán na biblioteca axudando na organización e xestión desta. Entre outras cousas, as voluntarias e voluntarios realizarán o préstamo de libros, axudarán a buscar os exemplares que os usuarios lles demanden e ordenarán as diferentes obras dacordo ao nivel de lectura e autor.

martes, 5 de noviembre de 2024

BIBLIOTECA TENEBROSA

Estes últimos días, o noso centro estivo decorado para festexar o Samaín e, como non podía ser doutro xeito, a nosa biblioteca foi partícipe destas datas e pasou a converterse nun espazo tétrico e lúgubre ao que as diferentes clases do cole acudiron a realizar "lecturas tenebrosas".

lunes, 4 de noviembre de 2024

24O. DÍA DAS BILIOTECAS ESCOLARES

Este curso, para conmemorar o Día das Bibliotecas Escolares, que tivo lugar o 24 de outubro, os diferentes niveis do centro elaboraron murais cos títulos dos seus libros preferidos, cos cales decoramos os corredores durante estas semanas. 

Ademais, cada grupo-clase realizou unha votación para escoller con que nova obra lles gustaría contar na súa aula e así solicitar a súa compra ao Equipo de Biblioteca do centro. 

Facede click nas imaxes para poder ver algunhas fotografías do que estivemos a facer para conmemorar este día.

jueves, 24 de octubre de 2024

CONTACONTOS CON CRIS DE CALDAS

O pasado martes, 15 de outubro, con motivo da conmemoración do Día da Nena, os alumnos e alumnas do segundo ciclo de Primaria desfrutaron dunha sesión de contacontos da man de Cris De Caldas, quen lles presentou os seus “Contos en Lila”. Trátase dunha serie de historias que buscan xerar unha reflexión sobre o mundo que nos gustaría ter. Un mundo que non sexa nin rosa, nin azul, se non unha mestura de ambos: un mundo lila. 

miércoles, 23 de octubre de 2024

ESTAMOS DE VOLTA!

 Bos días! Benvidas e benvidos un curso máis ao blog da biblioteca do CEIP San Tomé. Despois dun mes de setembro de readaptación e volta á rutina, estreamos un novo proxecto de centro que servirá como fío condutor do traballo que cada unha das aulas realizará durante os vindeiros meses.

Deixamos atrás o tema “Da literatura ao cine” e damos paso ás VIAXES NO TEMPO. Cada ciclo levará a cabo a súa propia andaina temporal, reparando en diversos aspectos que lles poidan ser de interese de cara á obtención dun produto final que aínda non imos desvelar.

Animádevos a curiosear un chisco por esta presentación interactiva para coñecer un pouco máis a fondo a liña que seguirá cada ciclo, así coma algúns dos títulos cos que van traballar.

QUE COMECE A VIAXE!

lunes, 17 de junio de 2024

OBRA DE TEATRO DE 6º: "Perdidos en el bosque"

Hoxe algúns alumnos e alumnas de 6º de Primaria fixeron desfrutar ás demais clases do colexio cunha obra teatral creada por eles mesmos e mesmas, a cal leva por título: "Perdidos en el bosque".

Tras elaborar, revisar e modificar o guión, buscar o decorado necesario e ensaiar a representación do texto, estas nenas e nenos amosáronlle ao resto do alumnado esta fermosa historia. 

Podedes ver algunhas imaxes da mesma facendo click no cartel da obra.

Noraboa a todos e todas por esta peza teatral! Todo un exemplo de traballo en equipo e autonomía




sábado, 25 de mayo de 2024

I TORNEO DE PRIMAVERA DE XADREZ

Definitivamente, un dos grandes protagonistas deste curso no CEIP San Tomé está a ser o xadrez. Os alumnos e alumnas que actualmente están en 6º curso xa amosaran moito interés por este xogo a finais do curso anterior e pediran recibir clases sobre o mesmo. Atendendo á súa demanda, dende setembro están a ter unha sesión de xadrez cada tres semanas, na hora de Matemáticas, aprendendo sobre este xogo de mesa de estratexia da man dun profesional do mesmo.

Ver xogar aos maiores no recreo animou ao resto de nenas e nenos do centro a facelo tamén, convertendo as mesas do patio nun espazo de reunión dedicado ao xadrez. Vendo este gran éxito, varios rapaces e rapazas de 6º propuxeron realizar un torneo de xadrez no colexio e puxéronse mans á obra, coa axuda das súas mestras e mestres. Elaboraron os carteis cos que anunciaron o torneo, preguntaron polas aulas quen querería participar e organizaron as categorías e os diferentes cruces dentro destas.

Esta semana comezou o I Torneo de Primavera de Xadrez do CEIP San Tomé. Os máis maiores da escola preparan cada día os taboleiros cinco minutos antes de que comece o recreo e encárganse de exercer como xuíces nas diferentes partidas.

Facendo click aquí ou no cartel poderedes ver algunhas imaxes deste torneo.

Está a ser unha experiencia moi gratificante! 

"HARRY POTTER E A PEDRA FILOSOFAL": PROCESO DE CASTING

As alumnas e alumnos do 3º ciclo continúan na súa andaina cara a obtención do produto final do proxecto de centro deste curso: unha curtametraxe da obra literaria traballada ao longo do curso.

Unha vez que tiveron listo o guión das curtas de 5º e de 6º curso (os cales podedes ler no espazo web específico do proxecto do 3º ciclo), chegou o momento de comenzar a escoller quen serían os actores e actrices encargados de dar vida á cada un dos e das personaxes que nelas aparecerán. 

Os alumnos e alumnas interesados en obter os papeis principais de cada curta enfrontáronse a un proceso de casting, no cal tiveron que demostrar as súas dotes para o mundo da actuación fronte a un xurado composto por catro mestras do centro. 

Tras escoller aos protagonistas, os papeis secundarios foron asignados mediante un sorteo no cal participaron os nenos e nenas interesados en conseguir representar a cada un dos demais personaxes da curtametraxe.

II CERTAME DE PODCAST

 Tras o éxito obtido o ano pasado co I CERTAME DE PODCAST do CEIP San Tomé, este curso voltamos cunha nova edición, na cal, como non podía ser doutro xeito, imos aproveitar para dar a nosa opinión sobre o tema do proxecto que levamos traballado ao longo do curso: libro ou película?

Por aquí vos deixamos o cartel e as bases do certame. Estamos desexando escoitar eses marabillosos podcast!

Que comece o II CERTAME DE PODCAST do CEIP San Tomé!

jueves, 25 de abril de 2024

CONTACONTOS DA MAN DE BAIA FERNÁNDEZ

Como peche ás actividades realizadas con motivo do Día do Libro, onte, 24 de abril, recibimos no noso centro á escritora Baia Fernández de la Torre, natural de Cuntis. A nosa convidada realizou dúas sesións de contacontos: unha para o alumnado de Infantil e 1º ciclo, na cal presentou o seu último conto "Caracol, cara de col" (2023); e outra para os nenos e nenas do 2º e 3º ciclo, a quen lles leu a súa obra "Laia" (2018).

Graciñas pola túa visita, Baia!


miércoles, 24 de abril de 2024

23A. DÍA DO LIBRO

Boas a todos e todas! Rematamos o mes de abril conmemorando outro día destacado no curso: o Día do Libro. Ao igual que no resto de datas sinaladas, decoramos a entrada do centro cun mural, esta vez elaborado polo alumnado do 3º ciclo de Primaria. Nel podemos ver un debuxo e unha oración dalgúns dos libros traballados ao longo deste curso nas diferentes aulas do centro, coloreados seguindo a técnica do artista Piet Mondrian.

Por outra banda, e como xa é tradición, nesta xornada adoitamos realizar un apadriñamento e amadriñamento lector entre as nenas e nenos máis maiores do cole e os máis peques. Despois de ir coñecer aos seus afillados e afilladas, e de que estes lles desen o conto que querían que lles lesen, os cursos altos do centro prepararon a lectura dramatizada destas obras no tempo de lectura. 

Chegado o día, despois do recreo, os nenos e nenas maiores foron buscar aos seus afillados e afillados ás aulas e leváronos por diferentes rincóns do centro para lerlles o conto elixido. Como agradecemento por esta lectura, cada peque elaborou un fermoso marcápaxinas para o seu padriño ou madriña, o cal lles foi outorgado unha vez finalizada a actividade.

Se clickades na imaxe poderedes ver distintas fotografías deste momento tan fermoso!

HARRY POTTER: MAXIA OU CIENCIA?

Esta semana as rapazas e rapaces do 3º ciclo, xunto co alumnado de 4º de Primaria, desfrutaron dun taller de ciencia organizado pola empresa Cea Aberto. Nel puideron analizar e comprender en primeira persoa como detrás da maxia que puideron ver na primeira película da saga de Harry Potter se atopa, en realidade, a ciencia. 

Participaron, aprenderon e desfrutaron moito desta actividade, coa cal demos inicio á Semana da Ciencia, que proximamente celebraremos no centro.

Por aquí vos deixamos algunhas imaxes!

sábado, 20 de abril de 2024

PETER PAN: O PAÍS DE NUNCA XAMAIS

As alumnas e alumnos do primeiro ciclo de Primaria estiveron lendo no segundo trimestre o libro de “Peter Pan” e facendo moitas actividades relacionadas con esta historia e cos seus personaxes, entre as cales se atopa esta maqueta do país de Nunca Xamais que expuxeron na entrada do colexio.


Neste terceiro trimestre empregarán elementos desta historia traballada para crear eles mesmos e mesmas un novo conto que procurarán converter en película.


Atentos á carteleira!


martes, 16 de abril de 2024

ANALIZANDO DIFERENZAS: LIBRO VS. PELÍCULA

 Despois de ler a obra "As bruxas", de Roald Dahl, e de ver a respectiva película, o alumnado do 3º ciclo de Primaria volveu a levar a cabo a actividade realizada a finais do primeiro trimestre coa obra e filme de Harry Potter, elaborando un mural no corredor no que, por grupos, analizaron as diferenzas que identificaron entre a obra escrita e a súa produción audiovisual.

miércoles, 27 de marzo de 2024

SESIÓN DE CINE: LAS BRUJAS

 Como xa sucedeu no primeiro trimestre, e seguindo coa liña do PDI deste curso ("Da literatura ao cine"), rematamos este segundo trimestre cunha sesión de cinema. Esta vez, o alumnado do 3º ciclo de Primaria viu a película da obra que estiveron a traballar nestes meses na materia de Lingua Galega e Literatura: "As bruxas", de Roald Dahl.

As nenas e nenos de 5º e 6º curso reuníronse no ximnasio do centro e desfrutaron da proxección deste filme, acompañando o seu visionado con flocos de millos, patacas fritas e outros múltiples manxares. 



jueves, 21 de marzo de 2024

VISITA DE MARTA COSTA

O pasado xoves, 14 de marzo, o noso centro tivo o pracer de recibir de novo a unha ex alumna que, actualmente, é unha das promesas do mundo da actuación da nosa comunidade: Marta Costa.

Con tan só 19 anos, Marta xa participou nunha serie producida por Netflix, rodada na nosa vila, e xa aparece na pequena pantalla formando parte do elenco protagonista da serie “Ghuasapp”, da TVG. 


O alumnado de 5º e 6º curso preparou unha serie de preguntas para poder realizarlle unha entrevista á nosa convidada que lles permitise aos nenos e nenas afondar no seu traballo como intérprete, o cal está directamente relacionado co PDI deste curso “Da literatura ao cine”.  Entre outras moitas cousas, Marta faloulles de como son os procesos de casting, do formato dos guións dunha película ou serie, da forma de abordar o seu estudo, dos diferentes métodos de interpretación, de cal foi a actriz que  a inspirou nos seus inicios…


Graciñas por todo Marta, foi un auténtico pracer terte de volta! Desexámosche o mellor na túa carreira! Seguirémoste ben de preto, non o dubides.







sábado, 9 de marzo de 2024

8M. DÍA DA MULLER

Unha das datas máis destacadas deste mes de marzo é, sen dúbida, o día 8, xornada na que ten lugar a reivindicación da figura da muller na sociedade.

Unha das actividades que se levou a cabo no noso centro para conmemorar esta data foi a visita da compañía compostelá Medievándalos, a cal nos representou unha obra de teatro titulada “A cabaleira”, na que coñecemos as aventuras dunha princesa que non desexaba ser raíña, senón cabaleira.


Facede clik na seguinte imaxe para ver algunhas fotografías do noso alumnado desfrutando desta peza teatral. 


jueves, 29 de febrero de 2024

23F. DÍA DE ROSALÍA

Benvidas e benvidos de novo! Este mes de febreiro foi ben intenso. Ademais de festexar o tan ansiado Entroido, como así se pode ver no blogue do EACE do noso centro, dedicamos esta última quincena a traballar a figura dunha das escritoras galegas máis ilustres: Rosalía de Castro, coincidindo co aniversario do seu nacemento (23 de febreiro de 1837).

Como en cada celebración, elaboramos un mural para colocar na entrada do colexio. Esta vez, os nenos e nenas do primeiro ciclo de Primaria foron os encargados e encargadas de facer esta compisicón, na cal presentaron pequenos anacos dalgunhas das composicións máis representativas desta autora.

Por outra banda o alumnado de 5º e 6º de Primaria versionou, ensaiou e recitou diferentes poemas desta autora e foinos recitar ás aulas do resto de niveis do centro. Tamén elaboraron distintos fotopoemas con composicións de Rosalía cos que crearon un mural nun dos corredores do centro. Unha vez pasada esta data, encadernarán todas estas producións para crear un novo fondo de consulta para a nosa biblioteca. Tocade a imaxe se queredes ver individualmente cada un deles.



Por último, e como novidade este ano, impulsamos a dinámica de "Rosalía vén da man de..." para achegar ao alumnado a outras figuras destacadas da nosa literatura. Neste caso, como primeira "convidada", traballamos a Rosalía Morlán, quen tamén escribe poemas en galego, os cales son musicados por outro artista. O alumnado do segundo ciclo de Primaria foi o encargado de preparar algunhas composicións desta poetisa para recitar ante as nenas e nenos de Infantil.


Se facedes click nas imaxes poderedes ver algunhas fotografías destes recitados.

Noraboa a todos e todas e grazas polo voso traballo!


martes, 30 de enero de 2024

30X: DÍA ESCOLAR DA NON VIOLENCIA E DA PAZ

Hoxe, coma cada 30 de xaneiro, coincidindo co aniversario do falecemento de Mahatma Gandhi (1869-1948), conmemoramos o Día Escolar da Non Violencia e da Paz no noso centro. Durante estes días estivemos realizando diferentes actividades vinculadas con esta temática. Por exemplo, nas sesións de Lingua Galega e Literatura, as diferentes clases do colexio crearon distintas composicións poéticas relacionadas coa paz.
Por outra banda, o alumnado do terceiro ciclo foi o encargado de elaborar un mural, situado na entrada do centro, baseándose na temática desta xornada. Realizaron unha adaptación dunha das obras dun enigmático artista británico que firma baixo o seudónimo de Banksy. Escolleron “Kids on guns” (Nenos sobre armas), unha obra que busca antepoñer a inocencia e o cariño da infancia á violencia e á opresión. Colocaron tamén corazóns vermellos nos que incluíron o nome de lugares que actualmente, por desgraza, están en guerra, escribindo debaixo a palabra “paz” na súa lingua oficial.
Finalmente, como clausura a esta conmemoración, todos os alumnos e alumnas do centro, xunto co profesorado e as familias que puideron asistir, realizaron un acto que no que leron algunhas das composicións poéticas que eles mesmos e mesmas crearan na aula. Ademais, tamén tocaronImagine”, de John Lennon, coa frauta e realizaron tres bailes. En breves poderedes atopar fotografías e vídeos desta xornada no blog do Equipo de Actividades Complementarias e Extraescolares do noso centro.

miércoles, 24 de enero de 2024

HARRY POTTER: CONTINUAMOS AVANZANDO NO PROXECTO

Voltamos do Nadal coas pilas recargadas e con ganas de pasar á segunda fase do noso proxecto de centro: a elaboración dun guión cinematográfico. As alumnas e alumnos do terceiro ciclo xa comezaron a mergullarse neste proceso. Despois da lectura da obra de "Harry Potter y la piedra filosofal" e do visionado da película, foron elaborando un pequeno mural no que anotaron varias diferenzas que detectaron entre ambos.
Posteriormente, e tomando a obra escrita como referencia, cada nivel deste ciclo, por separado, fixo varias propostas sobre que partes lles parecían unha boa opción para rodar unha curtametraxe e realizaron unha votación para escoller a escena gañadora en cada curso. Agora que xa teñen en mente a secuencia que van gravar, están a elaborar o vestiario necesario para a rodaxe, o cal, ademais, será o seu disfrace no desfile de Entroido que celebraremos en breves. Tras a toma de medidas, a elaboración dos patróns e o corte das telas, chegou o momento de coser as túnicas, empregando a máquina coa que contamos no centro, grazas ao material de Polos Creativos. Menudo taller de costura que teñen montado!
Por outra banda, tamén andan a elaborar as variñas máxicas que cada un levará, empregando paus e arcilla.
Seguiremos informando dos avances no proceso! Clicka na imaxe para acceder ao espazo web específico do noso proxecto: 3º ciclo de EP. Harry Potter e a Pedra Filosofal.